Traspediante dirixe a aula Universitaria de danza en Ourense

O grupo preséntase por primeira vez ante o público co seu espectáculo 'Anclaje'

A Aula de Danza comeza pisando forte na MITEU e en Unidanza

Está formado por dez persoas, membros da comunidade universitaria e de fóra

Rosa Tedín | Ourense
Comezou a dar os seus primeiros pasos en outubro de 2010 e apenas seis meses despois a Aula de Danza do campus de Ourense está a recoller os seus primeiros froitos. O día 1 os seus bailaríns e bailarinas participaron na inauguración dunha das citas de referencia cultural da cidade, a Mostra Internacional de Teatro Universitario de Ourense MITEU, e desde este luns participan en Unidanza 2011, festival internacional que organiza a Universidade Carlos III de Madrid e cita obrigada para a danza universitaria en España. Co seu espectáculo Anclaje levan áncoras e comezan a súa andaina ante o público e ante o sector.

A Aula de Danza, chamada D-Ou Tras, creouse a principios de curso e na actualidade está composta por dez persoas, membros da comunidade universitaria e de fóra dela, cunha clara maioría de mulleres. Filemón Rivas, técnico de cultura do campus, explica que a creación deste grupo xurdiu coa idea de contrarrestar “o pouco calado que ten esta disciplina na cidade” e seguindo o exemplo das universidades da contorna, que xa contan con aulas de danza.

Para levar a cabo esta iniciativa seguise o esquema da Aula de Teatro do campus. Deste xeito, D-Ou Tras desenvólvese no marco dos obradoiros culturais cuadrimestrais que se realizan no campus. Este formato, explica Rivas, tense amosado moi eficiente pois “mestura formación, divulgación e difusión. Non queda só no primeiro chanzo senón que permite crear unha estrutura de continuidade que dá moito xogo, como xa temos comprobado coa Aula de Teatro”.

Primeiros pasos

Begoña Cuquejo e Marta Alonso, do Colectivo de Artes Escénicas Traspediante, son as responsables desta Aula de Danza. Salientan a excelente resposta das persoas que, na súa maioría sen coñecementos previos de danza, se animaron a apuntarse a esta iniciativa a principios de curso e que agora xa se enfrontan ao reto de actuar en público. “Na MITEU estreamos o noso espectáculo Anclaje nunha actuación na que tamén participaron as demais universidades galegas. Para nós foi moi importante porque supuxo a nosa estrea no circuíto de danza universitaria”.

Trala MITEU o grupo ourensán dá un paso máis adiante e participa agora en Unidanza 2011, que comezou este luns na Universidade Carlos III de Madrid e que se prolongará ata o venres. Cuquejo salienta a importancia desta participación, “pois o noso proxecto foi elixido e convidado a asistir, entre os moitos que se presentaron, xunto a outros catro de ámbito internacional, procedentes de México, Francia e Italia, e da Universidade Europea de Madrid”. Segundo explica, nesta elección pesou “principalmente o noso carácter de laboratorio contemporáneo”.

A Aula de Danza do campus de Ourense aproveita estes días en Unidanza para acudir ás conferencias que se imparten, para asistir aos espectáculos profesionais e universitarios que se realizan e para intercambiar coñecementos e experiencias cos seus homólogos. O mércores ás 18.00 horas amosaranlle aos asistentes o seu espectáculo Anclaje, unha intervención na que “parten de ancorar un elemento para mover o resto, sexa este elemento unha parte do corpo ou un concepto”.

http://duvi.uvigo.es/index.php?option=com_content&task=view&id=4661&Itemid=5

Traspediante organiza o primeiro encontro de danza universitaria en Ourense dentro do programa da MITEU

Prensa. La Región, Ourense.

"A Miteu sae ás rúas para anunciar a chegada do teatro"

Un espectáculo de 'circo musical burlesco' e un número de danza darán

inicio ás actividades teatrais dentro dos espazos pechados

la region. REDACCIÓN. OURENSE - 02-04-2011

Rosaura chegou onte ata o Parque de San Lázaro para anunciar o comezo de 15 días de teatro na cidade. Alumnos do primeiro nivel da Aula Universitaria de Teatro percorreron as rúas máis céntricas de Ourense en busca das artes escénicas. Desfiles, paradas, colorido e espectáculo ata chegar ós Xardíns do Padre Feijóo nun percorrido no que camiñaron acompañados de música en directo deron paso ás actuacións en espazos pechados.

Xa dende a primeira xornada, a Miteu mostrou a súa faciana máis internacional. O primeiro grupo en actuar foi o francés 'Les triples croches'. Procedentes de Lyon, visitaron España por primeira vez nesta ocasión para ofrecer o espectáculo 'Jamais deux sans trois', cheo de música, teatro e circo que deixan ver o eido multidisciplinar sinalado polo director do certame, Fernando Dacosta. Dirixidos polo 'clown' Roger Bories, 'Les triples croches' non foron quen de chegar a ofrecer un concerto na hora e cuarto que durou a obra. Niso consistía o argumento, nos intentos de tres personaxes -músicos e artistas de circo- por dar un número musical.

Pecharon o día un da Miteu e día un do mes de abril varias pezas de danza no Auditorio. 'Anclaje', 'Ellas', 'Rede na rede' e 'Próxima estación' chegaron da man de diferente colectivos artísticos galegos (Aula de danza do Campus de Ourense, Miriam Centro de Danza, Aula de Danza da Universidade da Coruña e Espazo de Danza do Campus de Lugo da Universidade de Santiago).

http://www.laregion.es/noticia/148880/miteu/anunciar/chegada/teatro/